एक
प्रवास.........
शाळेची
स्थापना : प्राथमिक विभाग – दिनांक ६
सप्टेंबर १९९४
माध्यमिक विभाग – दिनांक १० जून
२००३
नाशिक जिल्ह्यात नाशिकपासून ७५ कि.मी. अंतरावर ,
वणी-सुरगाणा मार्गावरच वणी गावापासून २८ कि.मी. अंतरावर सुरगाणा तालुक्यातील चिराई
घाटाजवळ , सह्याद्रीच्या कुशीत , माता गिराजादेवीच्या छत्रछायेत , गिरणा नदीच्या
खोऱ्यात वसलेले टुमदार गाव- मोहपाडा. नावाप्रमाणेच मोहात पाडणारे गाव. गावाला
लागुनच वणी-सुरगाणा रस्त्याच्या दुतर्फा वसलेली ही इमारत आहे-- १०० वर्षांची परंपरा असलेली व नावाजलेल्या
संस्थेची अर्थात मराठा विद्या प्रसारक समाज नाशिक संस्थेची - अनुदानित प्राथमिक व माध्यमिक आश्रमशाळा
मोहपाडा.
इ.स.१९९४ मध्ये दिनांक ६
सप्टेंबर रोजी गावातील लोकांच्या पुढाकाराने व सहकार्याने भाडोत्री खोल्यांत ही
ज्ञानशाखा सुरु केली. “बहुजन हिताय,बहुजन सुखाय” या ब्रीदाशी प्रामाणिक राहून
म.वि.प्र.समाज संस्थेने आदिवासी भागातील या गावात ज्ञानयज्ञाचा प्रारंभ केला.
गावातील जेष्ठ नागरिक श्री.सखाराम रायाजी
गायकवाड , अमृता काळू पवार, वामन सोनू दळवी, काशिनाथ झिप्रू जाधव अन गावकरी व तरुण
वर्गाने शाळेला आधार देत शिक्षकांच्या मदतीने व अपार मेहनतीने शाळेत ही आदिवासी
गोंडस मुले आकार घेऊ लागली. अन बघता-बघता १० जून २००३ ला इयत्ता ८ वी चा वर्ग सुरु
झाला. अन अवघ्या तीन वर्षात नैसर्गिक वाढीने आमची आश्रमशाळा १ ली ते १० वी पर्यंत
शिक्षण देणारे ज्ञानमंदिरच झाले. शाळेचे माजी मुख्याध्यापक श्री. सुभाष दळवी व
विद्यमान प्राथमिक मुख्याध्यापक श्री. संतोष गौळी यांच्या साथीने व मार्गदर्शनाने
शाळा बाळसे धरू लागली. शाळा पुस्तकी शिक्षणाबरोबर संस्कारांची शिदोरी देणारी
आधारवडच ठरू लागली.
१२ ऑक्टोबर २०१० साली संस्थेचे माजी
सरचिटणीस व कार्यकुशल आमदार डा वसंतराव पवार यांच्या दूरदृष्टीने व पुढाकाराने
गावाजवळच कै. धवळू दळवी यांचेकडून ५ एकर जागा शाळेसाठी संपादित केली.
इमारतीचे भूमिपूजन मा.खा. हरिश्चंद्र चव्हाण , कै.आमदार ए.टी.पवार यांच्या हस्ते
करण्यात आले. मोहपाडा गावाला अन परिसराला शोभेल व अभिमान वाटेल अशी प्रशस्त , सर्व
सोयी-सुविधा असणारी शाळा व वसतिगृह इमारतीचे बांधकाम सन २०१३ अखेर पूर्ण झाले.
शाळेची पटसंख्या गुणवत्तेच्या जोरावर भरभर
वाढू लागली. येथील शिक्षक वर्गाच्या अपार मेहनतीने व मुख्याध्यापकांच्या खंबीर
साथीने आणि मार्गदर्शनाने कृतीशील शिक्षणाबरोबरच विविध सहशालेय उपक्रम , क्रीडा ,
सांस्कृतिक , वैज्ञानिक व समाजोपयोगी उपक्रम राबविणारी शाखा म्हणून नावलौकिक
मिळविणारी आमची आश्रमशाळा मोहपाडा. या सर्वच क्षेत्रातील बातम्या वृत्तपत्रांमध्ये
झळकल्या. बघता-बघता शाळा, परिसरातील पालकांची व विद्यार्थ्यांची पहिली पसंद ठरू
लागली. अन दरवर्षी नवीन प्रवेशासाठी पालकांची रीघ लागू लागली. पालकांप्रमाणेच जिल्हा
परिषद , प्रकल्प कार्यालय कळवण येथील अधिकाऱ्यांच्याही नजरेत भरणारी आश्रमशाळा
ठरली. शाळेत राबविले जाणारे ऋतुरंग सांस्कृतिक महोत्सव , शैक्षणिक सहल , वनभोजन ,
क्रीडा क्षेत्रातील यश इत्यादी बाबी उल्लेखनीय ठरल्या.
सन २०१४-१५ , २०१५-१६, २०१६-१७ या सलग तीन वर्षात शाळेचा
एस.एस.सी. निकाल १००%, दरवर्षी आदिवासी विकास विभागाच्या क्रीडा स्पर्धामध्ये
व्हालीबॉल क्रीडाप्रकारात राज्य, विभाग पातळीपर्यंत सहभाग आणि शैक्षणिक वर्ष २०१९-२० मध्ये राज्य स्तरावर उपविजेते पदाचे पारितोषिक मिळाले. म.वि.प्र.सांस्कृतिक
महोत्सवात तालुका व जिल्हास्तरावर प्रथम पारितोषिक, शिष्यवृत्ती , एकलव्य व
म.वि.प्र.स्पर्धा परीक्षेत विद्यार्थी निवड अशा अनेक यशस्वी उपक्रमांसह शाखेची
वाटचाल सुरु आहे.
२१ व्या शतकात जगाच्या
स्पर्धेत आश्रमशाळेचे आदिवासी विद्यार्थी देखील आत्मविश्वासाने सामोरे जाण्यासाठी
आमच्या शाळेने चालू शैक्षणिक वर्ष २०१७-१८ मध्ये माध्यमिक मुख्याध्यापक श्री.दीपक कणसेपाटील
व प्राथमिक मुख्याध्यापक श्री. संतोष गौळी यांच्या मार्गदर्शनातून एक अभिनव उपक्रम
राबविला. तो म्हणजे “लोक सहभागातून डिजिटल शाळा” विशेष म्हणजे याची सुरुवात
शिक्षकांनी स्वतःपासून केली. मुख्याध्यापक व सर्व शिक्षकांनी एक दिवसाचे वेतन
शाळेला दिले. आमच्या या अभिनव उपक्रमाला पालकांनी भरभरून प्रतिसाद दिला.
ज्ञानरचनावाद रुजविण्यासाठी आकर्षक व ज्ञानवर्धक भित्तीचित्रे रंगकाम केले. आणि
शाळेचा कायापालट झाला. या उपक्रमातील पालकांचा मोलाचा वाटा तो शब्दापलीकडचा आहे.
त्याचाच परिणाम म्हणजे आजची स्वच्छ , सुंदर, आकर्षक , ज्ञानवर्धक शाळा – अर्थात
आश्रमशाळा मोहपाडा !
शाळेने हे सर्व कार्य सरचिटणीस
श्रीमती निलीमाताई पवार व कळवण – सुरगाणा तालुका संचालक श्री. अशोकदादा
पवार यांच्या प्रोत्साहनाने व
मार्गदर्शनाने तडीस नेले.
सन १९९४ ते २०१९ या २५ वर्षाच्या
काळात शाळेसाठी मुख्याध्यापक , शिक्षक , अधीक्षक , शिक्षकेतर कर्मचारी , माजी
विद्यार्थी , गावातील जेष्ठ नागरिक , तरुण यांनी मोलाची साथ दिली. ज्ञात- अज्ञात
लोकांनी शाळेच्या प्रगतीत हातभार लावला. शाळा त्यांच्या कायमच ऋणात राहील.
यापुढेही आपल्यासारख्या होतकरू पालक वर्गाची व विद्यार्थ्यांची साथ आवश्यक आहे व आर्थिक
मदतीचा हात सुद्धा !
Warli Painting YOU TUBE CHANNEL |